Күршімде жаңа бассейн ашылды

"Ауыл - Ел бесігі" бағдарламасы аясында салынған бес жүзу жолақты бассейн ғимаратында сауна, тамақ ішетін бөлме (буфет), жаттығу залы бар.

- Биыл індетке қарамай, ауданымыз үшін тың жаңалықтарға толы жыл болды. Олай дейтініміз, аудан орталығында көптен күткен жабық жүзу бассейні қолданысқа берілді. Аталмыш нысан ауданымызда жүзу спортын дамытып, халық игілігіне айналарына сенімдімін, - дейді Күршім ауданының әкімі Дулат Қажанов.

Ауданның көркейіп, жаңа нысанның ашылғанына жергілікті тұрғындар да дән риза. 

- Ауданымыз күн сайын көркейіп, жаңа бейнеге еніп келеді. Елдің ертеңі - жастар. Сондықтан жастарымыз мықты, батыл болуы үшін осындай спорттық нысандар әр ауылда болса жақсы болар еді, - дейді аудан тұрғыны Дәулет Темірханов.