ШҚО-да бір күнде 1500-ден астам әкімшілік құқық бұзу фактісі анықталды

ШҚО полиция департаменті баспасөз қызметінің мәліметіне сүйенсек, өңір аумағында қоғамдық қауіпсіздікті қамтамасыз ету, қылмыстың алдын алу және ескерту мақсатында 23-30 қараша аралығында «Құқықтық тәртіп» жедел алдын алу шарасы өткізілуде. 
Бір күн ішінде полиция қызметкерлері 20 қылмысты және осыған дейін жасалған 25 қылмыстық істі ашты. 

- Шара барысында тәртіп сақшылары 1590 әкімшілік құқық бұзушылықты анықтады. Оның ішінде ұсақ бұзақылық жасаған – 181, алкогольді ішімдік ішіп алып қоғамдық орындарда жүрген – 291, мас күйде көлік тізгіндеген – 17 адам болды. Бұдан бөлек, тіркеуге алынғандар арасында белгіленген шектеулерді бұзудың 15, қорғау нұсқамасын аттаудың 18 фактісі анықталған, - деді департамент бастығы Сағат Мәдиев.

Полицейлер заңсыз сақталған 8 атыс қаруын тәркіледі. Мәселен, тексеру барысында 66 жастағы Көкпекті ауданы тұрғынының гаражынан 16-калибрлі тегіс ұңғылы мылтық табылған. Қазірде аталған факті бойынша баллистикалық сараптама тағайындалды. Осы ретте, департамент өкілдері қандай да бір заңбұзушылыққа куә болған өңір тұрғындарын бірден «102» арнасына хабарлауға шақырады.