Биыл өңірдегі 394 түлек шетелге оқуға кетпек

Облыста 16 ҰБТ өткізу пункті жабдықталды, оның ішінде 4 аймақтық университет пен 12 орта мектеп бар. Бұл жайлы ШҚО ақпараттық орталығында өткен брифинг барысында айтылды.

- Биыл бізді бір қуантқан жағдай – жылдан жылға мектеп бітіруші түлектердің ҰБТ тапсырып, ЖОО-ға түсуге ынталары артып келе жатыр. Мысалы, былтыр түлектердің 76%-ы өтініш білдірсе, биыл 84,4%. Бұл дегеніміз – білім қуған жастардың көбейіп келе жатқанынан анық хабар береді, - деді облыстық Білім басқармасының басшысы Сайрангүл Жұмаділова.

Әгәрәки ҰБТ тапсырушы түлектер тест кезінде тыйым салынған заттармен ұсталса, аудиториядан шығарылады және тест нәтижесі, білім беру гранты жойылады. Бұрын тестілеу 3 сағат 50 минут болса, қазір 10 минут қосылып, 4 сағатқа ұзартылды. 

ШҚО әкімі Даниал Ахметовтің бастамасымен қолға алынған "Білікті маман" жобасының аясында облыста шетелде білім алғысы келетін түлектердің саны азайған.

- Биыл Өскемен мен Семей қалаларындағы мектеп түлектерінің 394-і шетелде оқымақ. Себебі отбасыларымен бірге қоныс аударады екен. Бүгінде түлектердің  40%-дан астамы өңіріміздегі жоғары оқу орындарында білім алуға ниет білдірді. Ал қалғандары еліміздің өзге аймақтарында білім алуды жоспарлап отыр, - деді Сайрангүл Жұмаділова.