Алакөлге қашан ғаламтор тартылады?

Бұқтырма, Сібе және Алакөлдегі демалыс базаларының таудың етегінде, әлемтор істемейтін жерде жатқаны белгілі. Өңір әкімдігі шалғайдағы туристік сервисті жақсарту үшін ғаламтор желісін орнатуға мән бере бастады. Алайда шығыны көп болғандықтан, кезең-кезеңімен жүзеге асырылмақ. Алдымен келушісі көп Алакөлге интернет тартылады. 

- Биыл қараша айынан бастап Алакөлге оптикалық талшықты қабель тарту жұмыстары басталады. Ал келесі жылы бұл маңда жылдамдығы жоғары интернет желісі толық қосылып бітеді деп жоспарлап отырмыз, - дейді облысық туризм және сыртқы байланыстар басқармасының басшысы Марат Қабақов.

Ал әзірше өңірдің көрікті жерлеріне демалуға барғысы келген жұртшылық Toureast.kz сайтына еніп, содан маршрут таңдай алады. Бұл жерде Алакөл мен Бұқтырмадағы демалыс үйлері жайлы ақпараттар да бар. 

Ғаламтор желісі тартылса, аймаққа келетін шетелдік туристердің де санын көбейтуге мүмкіндік тумақ. Қазіргі уақытта өңірге келетін туристердің 95%-ы - қазақстандық азаматтар. 

- Ішкі нарықты да игеру үшін үлкен жұмыс жасау керек. Қазір елдің батыс өңірлерінен турист тартуға тырысып жатырмыз, - дейді Марат Саятұлы.

Ал Алакөл мен Бұқтырмаға келетіндердің көбі, Туризм басқармасының зерттеулеріне сенсек, 25 пен 35 жас аралығындағы жастар екен. Соған орай, алдағы уақытта ұйымдастырылатын мерекелік шаралар да жастарға қарай бағытталмақ.