Халқы аз ауылға көш келе жатыр

Жыл сайын жұмыс күші аз шығысқа оңтүстіктен азаматтар тартылатынын бұған дейін де жазып келдік.  Жалпы Қазақстан Республикасының Еңбек және халықты әлеуметтік қорғау министрлігі жыл басында Шығыс Қазақстан облысына 2019 жылға арналған оралман және қоныс аударушыларды қабылдаудың өңірлік квотасы 651 отбасыға бөлінді. Оның ішіне 195 оралман отбасы (595 адам) және 465 қоныс аударушылар отбасы (1566 адам) кіреді. Міне, осындай 15-20 отбасы Көкпекті ауданының халық аз қоныстанған Биғаш ауылына көшіп келеді деп жоспарлануда. Бұл аудан орталығынан шалғайда жатқан елді мекендерді көркейту мақсатында қолға алынған бастама.

Мәселен, өткен жылы Көкпекті ауданына Алматы облысынан 12 отбасы қоныс аударған. Оған мемлекет қазынасынан 11 миллион теңге бөлініпті.

- Оңтүстіктен көшіп келген отбасыларды баспанамен толық қамтамасыз еттік. Жұмысқа орналастырдық. Ал балаларын білім беру мекемелеріне бердік. Бүгінде қоныстандыру картасына сәйкес аталған ауылдық округтердегі сатылатын бос үйлердің саны мен бағасы, мемлекеттік мекемелердегі, жеке кәсіпкерлер мен шаруашылықтардағы бос жұмыс орындарының саны аңықталды, - дейді аудан әкімдігінің қызметкерлері.