Шығыс өңірінде екі балабақша салынуда

Өскеменде салынып жатқан екі балабақшаның құрылысымен де жеке кәсіпкерлер айналысып жатыр. ЖМК ауданының Өтепов көшесінде салынып жатқан, үш қабатты, 250 балаға арналған балабақшаны кәсіпкерлер желтоқсан айына дейін салып бітіреміз деп отыр. Кейін бұл әлеуметтік маңызы бар нысанды облыс әкімдігі бес жылдың ішінде сатып алатын болады. Бұған 733 млн теңге инвестиция құйылған.

- Облыс әкімшілігі жеке кәсіпкерлер балабақшаға салынған инвестицияны төрт-бес жылдың ішінде қайтаратын болады, - дейді облыс әкімі Даниал Ахметов.

Балабақшаның бірінші қабатында кіші топтағы бүлдіршіндер тәрбиеленсе, екінші қабатында орта жастағы, үшінші қабатында үлкен топтағы балалар тәрбиеленеді.

Ал салынып жатқан екінші балабақша Революционная көшесі бойында, қалалық №15 орта мектептің маңында орналасқан. Бұл мекеме де 250 балаға арналған. Әзірше нысанның іргетасы ғана қаланған. Кәсіпкерлер оны ендігі жылдың басында салып бітеміз деп отыр. Әдетте, мұндай әлеуметтік нысан сегіз айдың ішінде салынып бітуі міндетті екен.

Екі нысанды да көрген облыс басшысы Даниал Ахметовтің құрылыс жұмыстарының жоспар бойынша жүріп жатқанына көңілі толып, кәсіпкерлерге керек кезде қолдау көрсетуге дайын екендігін жеткізді.