Музыкалық шеру биыл да өтеді

Алда келе жатқан Балаларды қорғау мерекесіне орай орталық алаңда ұйымдастырылатын балалар және жастар музыкалық оркестрлері мен ансамбльдерінің, хор және би ұжымдарының республикалық  шеруіне дайындықты №24 өнер мектебі әлден бастап кетті. 

Айта кетейік, Балаларды қорғау күнінде музыкалық шеру өткізуді ҚР Білім және ғылым министрлігі мен республикалық оқу-әдістемелік қосымша білім беру орталығы ұсынып, былтыр тұңғыш рет еліміздің түкпір-түкпірінде осы игі бастама қолдау тапқан болатын. Өскемен қаласында өткен шеруде әр музыкалық ұжымның оқушылары мен студенттері түрлі-түсті костюммен сап түзеген болатын. Биыл да бұл салт жалғасын таппақ.

- Былтырғы шерудегідей №24 өнер мектебінің атынан шеруде 100 адамнан тұратын сап түзелмек, - дейді өнер мектебінің директоры Марина Тарасенко. - Онда біздің оркестр бөлімінің талантты 50 тәрбиеленушісі мен эстрадалық сарынға негізделген күйдің сүйемелдеуімен 50 черлидер өнер көрсетеді. Оркестр ұжымы домбыра, қобыз, сазсырнай, тастұяқ, дабыл сынды ұлттық аспаптарда ойнайды.