Үржар ауданы егіс жұмыстарына дайындалуда

- Ауыл шаруашылығы техникаларын алуға болатын "Аграрлық несие корпорациясы" АҚ мекемелерінің өкілдерін және тұқым, тыңайтқыштар, гербицидтерді алу жолдарын түсіндіретін арнайы өкілдерді шақырдық, - деп мәлімдеді аудан әкімдігіндегілер. - Шара барысында "Егін шаруашылығы саласында қарастырылған жеңілдіктер", "КазАгроФинанс", "БРК лизинг", "Агротрак" АҚ арқылы лизингке ауылшаруашылығы техникаларын алу жолдары түсіндірілді. Сонымен қатар, "Соя дақылдарының селекциясы", "Күнбағыстың гибридті тұқымдары", "Топырақтың агрохимиялық анализдері" мен несие алу бағыттары қаралды.

Үржар ауданы облыстағы ірі ауылшаруашылық аудандарының қатарында. Былтырғы жылдың көрсеткіштері бойынша өндірілген ауыл шаруашылығы өнімдерінің жалпы көлемі 81 млрд теңгеге жетіп, облыс бойынша өндірілген өнімнің 12%-ын құрады.

- Биыл ауданымыздың егіс алқабын 186 мың гектарға жеткізу жоспарланып отыр. Соңғы 3 жылда ауданның егіс алқабы 2019 жылмен салыстырғанда 4,5 мың гектарға ұлғайып, ауданымыздың облыс көлеміндегі үлесі 13,5% жетті, - дейді әкімдіктегілер.

Жылдан жылға ауданның ауыл шаруашылығы құрылымдары соңғы үлгідегі ауыл шаруашылығы техникаларын сатып алып, егістікте сапалы сорттық тұқымдар (2021 ж - 8,0 мың тонна дәнді дақылдар тұқымы дайындалды) пайдалануда. Бүгінде нөлдік технологияны қолдану арқылы 16,0 мың га жер өңделуде.

Жалпы, жердің құнарлығын арттырып, жоғары өнім алу мақсатында ауданның ауыл шаруашылық құрылымдары минералды тыңайтқыштар (2020 ж. - 3,0 мың тонна) мен гербицидтерді (2020 ж. - 37,0 мың тонна) тұрақты қолдануды қолға алған.

- Үржар ауданының машино-трактор паркін жаңарту мақсатында соңғы 3 жылда ауданға жалпы құны 4,1 млрд теңге тұратын барлығы 550 бірлік ауылшаруашылық техникалары әкелінді, - деп мәлімдеді аудан әкімдігінде. - Қазіргі күні "Юбилейный" (Карашев М.Б) ЖШС және Ақшоқы ауылындағы "Бірлік" шаруа қожалығы (Садыгулов Асқат) жаңа үлгідегі "JONH DEERE" техникасын сатып әкелді.