Ұлан ауданындағы жер үйдің ауласын су басты

Аталған мәселе орын алғаннан кейін аудан әкімі тұрғындардан өз аулаларын қардан тазартуларын талап етті.

- Аудан тұрғыны хабарласып үйін су басу қаупі төнгенін жеткізді. Дереу көмекке төтенше жағдай қызметкерлері барып, ауладағы жиналған қар суын тазалады. Белгілі болғандай көшеден су келмеген. Ауладағы қар дер кезінде күрелмегендіктен ауа райының жылынуына байланысты су жиналған. Осыған байланысты ауданымыздың барлық тұрғындарының, әсіресе жеке үйлердің иелеріне тағы да ескерту жасаймын. Аулаларыңызды уақтылы тазалап, қарды шығарып, арықтар мен каналдарды тазалап, су өткізетін құбырларды ашу қажет. Ауа райы кез келген уақытта өзгеруі мүмкін. Сондықтан қардың еруіне және көктемгі су тасқынына дайын болу керек, - дейді Ұлан ауданының әкімі Ренат Құрмамбаев.

Тұрғындардың өз аулаларындағы қарды уақтылы тазартпағанын естіген әлеуметтік желі қолданушылары бұл істі жауапсыздық деп бағалады. 

- Әркім өз ауласын қардан тазартуға міндетті. Әйтпегенде ауланы су басып, үйге қауіп төндірмесіне кім кепіл?! Қардың шығарылмағаны өкінішті. Десе де, бұл жалқаулық немесе жауапсыздық, - дейді әлеуметтік желі қолданушысы Майкен Масенова.