Зайсан көшелерінің қары күрелмеген бе?
Зайсан ауданындағы халық кей көшелердегі қар қыс басталғалы бері тазартылмағанын айтып шағымдануда
- Автобус журетін Шаймардан көшесі тазаланбайды. Бұл көшеде әсіресе зейнеткерлер көп тұрады, - деп пікір білдірді аудан әкімдігінің әлеуметтік желідегі парақшасында Гүлжанат Ошақбаева.Тұрғындар жаяу жүргіншілер жолына да техника тимегенін алға тартады.
- Мешіт жақтағы бағдаршамнан базарға баратын жол мүлдем тазартылмаған. Көлік жүретін жолмен жүруге мәжбүрміз, - дейді зайсандықтар.Алайда Зайсан ауданы әкімдігіндегілер қардың қалың түсуіне байланысты қала, ауыл көшелерін қардан тазалау жұмыстары күн-түн демей жүргізіліп жатқанын айтып отыр.
- Зайсан қаласы бойынша 12 техника, яғни 2 грейдер, 3 камаз, 3 трактор, 4 погрузчик, сондай-ақ, аудан және қала әкімшілігінен 28 адам қар тазалау жұмыстарын жүргізуде. Қардың тапталып, ауырлауы техниканың жұмысына кедергі келтіруде. Сондықтан түсіністік танытып, сабыр сақтауларыңызды сұраймыз, - дейді аудан әкімдігіндегілер.Әкімдік әлеуметтік желідегі ресми парақшасы арқылы атқарылған жұмыстар жайлы ақпарат жариялап әлек.
- Техникалар күн-түн демей тазалап жүр, оңай емес, көзімізбен көріп отырмыз, - дейді тұрғындардың бірі. - Осы соңғы кезде көрсек те көрмегендей болып, бәрін жоққа шығаруды әдетке айналдырып бара жатқан сияқтымыз. Әдейі барлық көшені аралап шықтым, тіпті "Жаңатұрмыс" жаққа барғанмын, күреп жатқанын көрдім.