ШҚО-да күзгі-қысқы аңшылық маусымы басталады

Бұл туралы Шығыс Қазақстан орман шаруашылығы және жануарлар дүниесі аумақтықтық инспекциясы хабарлады.

Инспекцияның хабарлауынша, аң аулауға бекітілген аңшылық шаруашылықтарының аумағында ғана рұқсат. Сондай-ақ, аңшының жануарлар дүниесін пайдалану рұқсат қағазы және аңшылық-шаруашылық ұйымының жолдамасы болуы тиіс.

Қазіргі таңда ШҚО-да 56 аңшылық-шаруашылық бар, оның жартысында аң аулауға әлі де тыйым салынған.

- Қоршаған ортаны қорғау құрылымдарының қызметкерлерімен келіспеушіліктер болмас үшін әуесқой аңшыларға бірінші кезекте Қазақстан Республикасы Ауыл шаруашылығы министрінің міндетін атқарушының 2015 жылғы 27 ақпандағы No 18-03/157 бұйрығымен бекітілген аң аулау ережелерімен мұқият танысып шығу керек, - деп хабарлады инспекция.