Қарауыл төбедегі қарқынды жұмыстар

Биыл Абай ауданына қарасты елді мекендерді абаттандыру жұмыстары белсенді жүргізілуде. Соның нәтижесінде Қарауыл төбе басына "Абай 175" деген жарықтандырылған көлемді жазу орнатылды. 

Абай ауданында ағымдағы жылы "Жұмыспен қамтудың жол картасы - 2020" бағдарламасы негізінде Абай Құнанбайұлының 175 жылдық мерейтойына орай республикалық және облыстық бюджеттен 1811 671,3 мың теңге қаржы қарастырылыпты. Бұл туралы Абай ауданы әкімінің орынбасары Мейржан Смағұлов мәлім етті. 

- Бөлінген қаражат аясында Абай атындағы саябаққа жөндеу жұмыстары жүргізілді. Сонымен қатар, Қарауылдағы Мамай көшесінде орналасқан 16 көппәтерлі тұрғын үйге ағымдағы жөндеу және Жидебай елді мекеніне стационарлық-гигиеналық торап орнату жұмыстары жүргізілді, - дейді аудан әкімінің орынбасары Мейржан Смағұлов.

Оның айтуынша, Абай Құнанбайұлының 175 жылдық мерейтойына орай Қарауыл төбе басына "Абай 175" деген жарықтандырылған көлемді жазу орнатылыпты. 

- Осы жылы Қарауыл төбесіне абаттандыру жұмыстары белсенді жүргізілді. Төбедегі ипподромды және дала сахнасына жөндеу жұмыстары жүргізіліп, Қарауыл төбе басына "Абай 175" деген жарықтандырылған көлемді жазу орнатылды. Сонымен бірге, Қарауыл дағы мектеп алдындағы гүлзарлар мен ауыл іші толық абаттандырылды. Тоқтамыс көшесіне "Street Workaut" орнатылды. Семей қаласынан Қарауылға кіре беріс жолдар мен арка қайта жөндеуден өтті. Кіре беріске "Адамзаттың бәрін сүй бауырым деп" деген жарықтандырылған көлемді әріптер орнатылды, - дейді Мейржан Смағұлов.

Тағы бір айта кететіні, "Өңірлерді дамыту" бағдарламасы аясында Құндыз ауылында 402,0 мың теңге және Медеу ауылында 438,0 мың теңгенің жұмыстары атқарылыпты. 

- Аудандық бюджеттен Қарауыл ауылын абаттандыруға және саябақтарды күтіп ұстауға 38 803,5 мың теңге жұмсалса, қосымша 8 ауылдық округті көгалдандыру мен тазалығына 11 351,5 мың теңге қаржы бөлінді, - дейді аудан әкімінің орынбасары өз сөзінде.