Усть-Каменогорск и ВКО Мемлекеттік қызметкер жетіспейді
Былтыр Жарма ауданында 15 қызметкер жұмыстан шыққан. Бұл көрсеткіш өзге аудандармен салыстырғанда көп
Жалпы қазіргі уақытта ауданда 180-ге жуық мемлекеттік қызметкер жұмыс істейді. Тағы да 30-ға жуық мемлекеттік қызметкердің орны бос тұр. Ал былтыр жұмыстан босаған 15 қызметкердің жартысы отбасы жағдайына байланысты қызметтен кетсе, жартысы басқа жаққа қоныс аударуына байланысты жұмыстан шыққан.
Жалпы бұл аудандағы мемлекеттік қызмет саласындағы жұмыстар біршама ақсап тұр. 2018 жылы және 2019 жылдың жарты жылдығында аудандық Әдеп жөніндегі кеңестің бірде-бір отырысы өткізілмеген.
- Өйткені прокуратура мен сыбайлас жемқорлыққа қарсы күрес басқармасы тарапынан ешқандай шағым түскен жоқ әрі қызметтік зерттеу жүргізуге ешбір факті тіркелген емес, - деп түсіндірді Жарма ауданы әкімінің орынбасары Айдар Маратұлы.
Алайда ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша департаментінің Әдеп жөніндегі кеңесі жазаға тартылған мемқызметкерлердің құқығын қорғау үшін отырыстар өткізу керектігін айтады.