“Нұр Отан" белсенділері жинаған ұсыныстар үкіметте қаралатын болады

Сайлау алдындағы үгіт-насихат жұмыстарына орай билеуші партия аудан-ауылдарда штабтар құрып, тұрғындардың арыз-шағымдарын қабылдады, деп хабарлайды Устинка Live тілшілері.

Қоғамдық қабылдауға 1200-ден аса адам жүгініп, 2000-нан аса өтініш келіп түскен. Партияның белсенділері мен еріктілері 500 мыңнан аса пәтер мен жер үйлерді аралап, тұрғындардан ұсыныс жинады. Ал партияның сайлау алдында іске қосқан басты акциясы – "Бірге" аясында жергілікті халықтан 53 мыңнан аса ұсыныстар мен өтініштер жиналған.

- Халықтан әлеуметтік қамсыздандыру, білім беру, денсаулық сақтау, тұрғын үй, ауыл шаруашылығын дамыту мәселелері бойынша ұсыныстар келіп түсті. Баспана салу, жол салу мәселесіне көңіл аударғандар көп. Жиналған ұсыныстардың барлығы республикалық штабқа жіберіліп, үкіметтік тұрғыдан шешім қабылдауға қолданылмақ, - дейді “Нұр Отан" партиясының ШҚО облыстық филиалы төрағасының бірінші орынбасары Әнуарбек Мұхтарханұлы.