Туристік полиция деген не?

Елде полиция қызметіне түрлі реформалар енгізіліп жатқаны белгілі. Сондай реформалардың бірі - туристерге қызмет көрсететін арнайы полиция бөлімшесін құру туралы шешім.

Мұндай бөлімшелер алдымен Елорда мен Алматыда, Ақмола мен Алматы, Түркістан мен Шығыс Қазақстан облыстарында құрылмақ. Ал шығыс өңірі бойынша туристер көп келетін аумағы Алакөлде, яғни, Үржар ауданында арнайы полиция бөлімшесі орналастырылмақ. Олар шетелден келген туристерге барып, көмек көрсетеді.

- Туристік полицияның басты міндеті - туристерге кеңес беріп, жол сілтеу. Тағайындалатын қызметкерлер өлкенің тарихын жетік білуі керек. Сол арқылы шеттен келген қонақтарға мағлұмат беріп, бағыт-бағдар көрсетеді, - деп түсіндірді облыстық ПД баспасөз хатшысы Айгерім Нұрғазина.

"Жаңа" полицейлерге видеотіркеу құралдары мен планшет, рация сынды жабдықтар берілмек. Оның үстіне, қызметкерлер қазақ, орыс тілдерімен бірге ағылшын тілін де жетік білуі міндетті.