Усть-Каменогорск и ВКО Шенеуніктерге сыйлық алуға болмайды
Алдағы айда Тәуелсіздік мерекесі мен Жаңа жыл мерекесі қарсаңында сыйлық алмасу артатыны белгілі
Алайда құзырлы органдар мұның заңсыз екенін айтып, мемлекеттік қызметкерлерге Жаңа жыл мерекесі кезінде сыйлық алуға тыйым салуда.
Бұл жайында Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша департаменті жанындағы Әдеп жөніндегі кеңес отырысында айтылды.
- Мекеме басшыларының отырысқа жиналғанын пайдаланып, алда келе жатқан Жаңа жыл мерекесі кезінде сыйлық алуға болмайтындығын ескерткім келеді. Мұны мемлекеттік қызметкерлерді қорғау үшін емес, халықты орган қызметкерлеріне сыйлық жасамауға үйрету үшін айтып отырмын. Қымбат сыйлық алғанша, ізгі ниет білдіргісі келгендерден бір ауыз құттықтау естіп, тілек тыңдасаңыздар жеткілікті, - дейді департамент басшысы, Әдеп жөніндегі кеңес төрайымы Жанна Қабдолдақызы.
Ал Жаңа жыл кезінде департамент қызметкерлері мемлекеттік мекемелер ішінде жасырын рейд жүргізіп, заңсыздықтарды анықтайтын болады.
