Дәрігерлерге ағылшын тілі оқытылады

Ал келесі жылы ана босандыратын тағы да он дәрігер шетелге оқуға жіберіледі. 
Мұны ЖМК ауданындағы Ана мен бала орталығының жұмысымен танысуға барған облыс әкімі Даниал Ахметов баяндады. Әкімнің ойынша, алдағы екі жылдың ішінде облыстағы маңызды ауруханалардың барлығына заманауи медициналық жабдықтар сатып алынады, алайда оны пайдалана алатын мамандар тапшы болуы мүмкін. Сондықтан дәрігерлерге қазірден бастап жаңа жабдықтарды қолданудың әдіс-тәсілдерін үйрету керек. Ал оны үйрену үшін дәрігерлер шетел ауруханаларында оқытудан өткізіледі.  

- Дәрігерлерді шетелге жіберу үшін ағылшын тілін білулері керек екені түсінікті. Сол себепті мамандар қазірдің өзінде дайын болуы тиіс. Ол үшін жас мамандарға ағылшын тілін оқытуды қолға алу керек. Маусым айынан бастап қыркүйекке дейін Ана мен бала орталығындағы мамандардың барлығына ағылшын тілінен курс ұйымдастыру қажет, - деп тапсырма берді облыс әкімі Даниал Ахметов өзінің орынбасарларына.

Биыл Ана мен бала орталығынан он дәрігер шетелге оқуға жіберілген. Ендігі жылы да он маман оқуға аттандырылады деп күтілуде. Шетелге оқытуға ана мен бала денсаулығы, кардиология, онкология саласындағы дәрігерлер жіберілуде. Биыл барлығы 50 дәрігер шетелге оқуға жіберілмек.