Спорт ШҚО-да ауыр атлетикадан облыстық чемпионат өтті
Өскеменде ауыр атлетикадан 20 жасқа дейінгі жастар мен қыздар арасында облыстық чемпионат өтті. Жыл сайынғы сайысқа 80-ге тарта ауыр атлет қатысты
ШҚО Дене шынықтыру және спорт басқармасының баспасөз қызметі ұсынған ақпаратқа сүйенсек, спортшылар 15 салмақ бойынша мықтыны анықтады. Оның ішінде жастар 8 салмақта, қыздар 7 салмақ бойынша бақ сынады. Облыстық чемпионатқа өскемендік ауыр атлеттерден бөлек, Семей қаласының, сонымен қатар, Зырян, Күршім, Шемонаиха аудандарының спортшылары келді.
- Жарыстың мақсаты - жастар арасында ауыр атлетиканы кеңінен насихаттау және жоғары нәтиже көрсеткен спортшылардан облыс құрамасын жасақтау, - деді ауыр атлетикадан ШҚО аға жаттықтырушысы Денис Девяткин.
Айта кетейік, Қазақстан Республикасының чемпионаты ақпан айының 14-і мен 19-ы аралығында Қызылорда қаласында өтпек.
