Өскемен мен ШҚО 
Өскемен дүкендерінде мұқтаж жандарға арналған контейнерлер орналастырылды
Қала тұрғындары мұндай контейнерлерге азық-түлік, киім-кешектер салу арқылы мұқтаж жандарға көмектесе алады.
Контейнерлер ФрешМаркет, «ЦУМ» сауда үйі және Метро гипермаркеті ішінде орналасқан. Қандай да бір қиын жағдайда қалған кез келген азамат контейнер ішіндегі заттарды пайдалана алады.
- Тастамаңыздар, салыңыздар. Қаламызда мейірімді жандардың бар екеніне сенімдімін. Бұл акция – аз қамтылған отбасыларға көмек көрсетудің бір түрі, - дейді Өскемен қаласының әкімі Қуат Тұмабаев.
Мұндай контейнер «Колос» дүкенінің ішінде де ашылған. Тұрғындар дүкеннен азық-түлік сатып алады да, кейбірін мұқтаж жандарға арнап жасалған сөренің үстіне қойып кетеді.
Алдағы уақытта мұндай сөрелер «Самал» (Бажова 331/1) супермаркетінде, Согра шағын ауданында ашылмақ.
