Қазақстан Виртуалды медиация кабинеті ашылды
Облысымыздағы Қазақстан Халықтар Ассамблеясы республика бойынша алғаш болып виртуалды медиация кабинетін ашты
«Цифрлік Қазақстан» бағдарламасына орай жасалған бұл виртуалды бағдарлама кәсіби медиаторлар мен республика азаматтары арасында байланыс орнату мақсатында жасалған.
Виртуалды медиация кабинеті ШҚО Достық үйінің интернет порталында орналастырылған.
- Виртуалды медиация кабинетін ашудағы мақсатымыз - халыққа жеңілдік көрсету. Жұртшылыққа үйінде отырып-ақ өзінің мәселесіне қатысты мамандармен кеңес жүргізуіне мүмкіндік беру. Сонымен қатар, елімізде медиация саласын дамытуға да үлес қосу басты мақсатымыз болып отыр. Елбасы ҚХА-ның 22-сессия жиналысында Ассамблеяға медиация саласын дамытуға тапсырма берген болатын. Бұл - халық пен медиаторларды жақындастыруға септігін тигізетін жоба, - деді облыстық Достық үйі директоры Елдар Төлеубеков.
Бүгінгі таңда Шығыс Қазақстан облысы бойынша медиаторлар ұйымының тіркеуінде 47 кәсіби медиатор, қала және аудан әкімдігі сайттарында 174 кәсіби емес медиатор тіркелген.
- Мұндай жобаның Қазақстанда ешқандай ұқсас баламасы жоқ. Жалғыз десек болады. Виртуалды медиация кабинетіне тіркелуді барынша жеңіл қылуға тырыстық. Тек ең қажетті мәліметтерді ғана тіркеуіңізге болады: аты-жөні, ауданы, мекенжайы, ұялы телефон нөмірі және е-mail мекенжайы. Кейін кәсіби медиаторлар сайтқа тіркеле отырып, өздерінің құжаттары мен сертификаттарын жүктейді, - деді виртуалды медиация кабинеті бағдарламасын жасақтаушысы, жоба авторы Александр Михайлин.
Қымбат Берікұлы