Қазақстан Инватакси мәселесі шешімін таппақ
Шығыс өңірінде мүмкіндігі шектеулі жандарға арналған «инватакси» мәселесі екі жыл болды шешімін таппай келеді
Облысымызда мүмкіндігі шектеулі жандардың тасымалына арналған 8 инватакси бар. Оның төртеуі Өскемен қаласында және төртеуі Семей қаласына тиесілі. Бірақ таксидің бар болғанымен, мүгедек жандардың оған жету мәселесі қиындық туғызып отыр.
- Көпқабатты үйлерден мүгедектер өз еріктерімен шығып-түсе алмайды. Сондықтан оларға өздерін шығарып, кіргізетін, демеу болатын кісі жалдауға да тура келеді, - деді қоғамдық кеңес отырысына қатысушылардың бірі.
Бұл мәселені «Алтын-ай» мүгедектерге арналған қоғамдық бірлестігінде де бұл мәселені екі жыл болды көтеріп отырған көрінеді.
- 2 жыл болды бюджетті жоспарлаған кезде біз қосымша жұмысшы лауазымының қажет екенін көрсетеміз. Алайда ол жыл сайын қысқартылып қалады, - деді «Алтын-ай» мүгедектерге арналған қоғамдық бірлестігінің жетекшісі Мағиза Мирвазетдинова.
Алайда мүгедектерге инватаксиге жетуге демеу болатын қосымша жұмысшы жалдауға ШҚО Жұмыспен қамту және әлеуметтік бағдарламалар бөлімінде қаражат жоқ екен.
- Облысымыздың бюджетінде миллиардтаған қаражат бар болса, мүгедектерге демеу болатын екі қосалқы жұмысшыға 1-2 миллион теңге біздің бюджеттің азайып қалуына қатты әсер етпейді. Өз бастарыңда ондай қиындық болмаған соң сіздер, әрине, мүмкіндігі шектеулі жандарды түсінбейсіздер. 2 жыл бойы көтеріліп келе жатқан мәселені шешпегендерің қалай? - деді облыстық мәслихаттың хатшысы Владимир Головатюк.
Қоғамдық кеңес отырысында Владимир Головатюк инватаксилерге қосалқы жұмысшылар лауазымын ашып қана қоймай, олардың қалай санын көбейту керектігін және әр ауданда қажеттілігіне қарай 1-2 инватаксиден болу керектігін дөп басып айтты.
