Депутаттардың жалақысы артпайды

Үкіметтің «2017-2019 жылдаға арналған республикалық бюджет туралы» ҚР Заңын мақұлдау бойынша отырысында қаржы министрі Бақыт Сұлтанов «Қарулы күштердің әскери қызметкерлері, ішкі істер органдарының қызметкерлері мен депутаттардың еңбекақыларын көбейту үшін 33,1 млрд теңге қарастырылғандығын» хабарлады. Қаржы министрі депутаттардың жалақысы туралы анықтап айтып кетті. - Жалақыға қатысты сұрақтарды бір мәтінге сыйдыра салу көпшілікті шатастыратыны анық. Сондықтан да нақтылап өтуді жөн көрдім. Жалпы 33,1 млрд теңге соманың негізгі бөлігі – 32,5 млрд теңге әскери қызметкерлер мен ішкі істер органдарының қызметкерлерінің жалақысын арттыруға бағытталады. Ал депутаттардың жалақысына келетін болсақ, бұл жерде жалақының көктемде өзге мемлекеттік қызметкерлердікімен теңестірілгендігі сөз болып отыр. Ол мақсатта 640 млн теңге қарастырылған, - деп нақтылап өтті министр.