Казахстан Халықаралық көрмеге 6000-ға жуық аягөздік бармақ
«ЕХРО-2017» кешенінде 155 мемлекет пен 22 халықаралық ұйым павильондары жайғасқан. Үш айда шараны тамашалауға 5 млн адам келеді деп жоспарлануда
Мемлекетімізде өтіп жатқан осындай ауқымды шараға Аягөз ауданынан да 6000-ға жуық адам барады деп жоспарланған. Аудан тұрғындарынан ерекше көрмені тамашалау үшін біраз азаматтар аттанып та кетті. Сол алдыңғы лектің қатарында 15 маусымда Семей-Қарағанды пойызымен 47 оқушы сапарға шықты. Ал 15 маусым мен 7 шілде аралығында аудан бойынша 10 топқа бөлінген 470 оқушы Астана төріндегі айшықты оқиғаның куәгерлері болмақ. Үш күнге жоспарланған танымдық сапарға баратын балалардың барып қайту жолы, жатын орны мен тамағы, қауіпсіздігі толық қарастырылған.
- Соңғы өнер табыстары мен ерекше көріністер орын алатын көрмеге бара жатқаныма қуаныштымын. Бейбітшілік пен тұрақтылық салтанат құрған мемлекетімізде осындай ауқымды іс-шаралар өтіп, дамып жатқанымыз Елбасымыздың арқасында. Үлкен шараға қатысу үшін жағдай жасаған аудандық басшылыққа алғысым шексіз, - деді қалалық мектеп-гимназия оқушысы Ғалым Төлеубеков.
Авторы: Айдос Мырзахметов
