Семейде көгілдір аудан бой көтеруде

ШҚО әкімі Семей қаласына жұмыс сапары барысында Қарағайлы ықшам ауданында жүріп жатқан құрылыс жұмыстарымен танысып қайтты. Бұл жаңа ауданда 6-9 қабатты үйлер мен әр пәтердің қолданысына қажетті көлік тұрағы, мектеп пен спорт кешені салынбақ. Қазіргі уақытта мөлтек ауданның мектебі салынып қойған, тұрғын үй ғимараттарының іргесі қаланып жатыр. 

- Сонымен қатар, бұл жерде бес мың орындық бірегей «Абай Арена» мәдени-спорттық кешені салынады. Онда 50 метрлік олимпиада бассейні мен синхронды жүзуге арналған арнайы бассейн салынады. Бұл аудан семейліктердің көз қуанышына айналары сөзсіз, - деді Даниал Ахметов.

Көпқабатты ғимараттар көк түсті кірпіштен салынып жатыр. Ғимараттардың сыртқы түсіне көп мән беретін облыс әкімі көк түсті кірпіштерге қатысты өз пікірін де білдіріп қалды. 

- Көк түсті кірпіштер жергілікті өндірушілердің материалдары. Сапасы да жоғары. Егер мердігер құрылыс материалдарын өзге мемлекеттерден алып келу қажет деп санаса, оған ешқандай қарсылық жоқ, - деді облыс әкімі.

Ғимараттардың түр-түсін қанық қылу арқылы аймақ басшысы сұр қаланың  сұйық келбетіне көрік сыйлағысы келетін сыңайлы.