ШҚО-да жол жөндеуге 3,5 млрд теңге бөлінді

125 шақырымға созылатын «Омск-Майқапшағай» және «Өскемен – Зырян - Үлкен Нарын – Катонқарағай - Рахман бұлағы» бағытындағы жолдың 16-шақырымына қайта жөндеу жұмыстары жүргізіледі.

- ҚХР Эксимбанкінен қарыз алу арқылы республикалық маңызы бар жолдардың 131 шақырымы қайта жөнделеді. Оның ішінде «Омск - Майқапшағай» жолының 9 шақырымы, «Таскескен - Бақты» жолының 20 шақырымы, «Қалбатау - Өскемен» жолының 102 шақырымы жөнделеді, - деді «ҚазАвтоЖол» ҰҚ АҚ ШҚО филиалының директоры Нұрланбек Өмірбаев.

Сонымен қатар, биыл Катонқарағай ауданындағы Рахман бұлақтарына апаратын жол, Ресей Федерациясымен шекаралас «Ауыл», «Уба» өткізу пункттері жатқан жолдар, «Өскемен - Семей» тас жолы бойындағы Жартас өзені арқылы өтетін көпірдің құрылыстары аяқталады.

- Республикалық жолдардың орта жөндеу жұмыстарына шамамен 3,5 млрд теңге бөлініп отыр. Оның ішіне Өскеменнен Семей қаласына бағытталған, Аягөзден Айғыз, Баршатасқа бағытталған, Өскеменнен Шемонаихаға, Рахман қайнарларына бағытталған жолдар кіреді, - деп қосты Нұрланбек Балықбайұлы.

Жалпы алғанда 142 мың шаршы метр жолдардың шұңқырлары жамалып, 20 мың шаршы метр жолдардың сораптары мен жоталары жөнделеді, 1 100 дана жол белгілері алмастырылып, орнатылады.

Ақерке Рағызбаева