Казахстан Оқу үрдісіне 7 модуль әдіс-тәсілдерін енгізу
Көкпекті ауданындағы Маяковский атындағы негізгі мектепте оқушылар арасында аймақтық семинар-практикум өтті
Аудандық білім, дене шынықтыру және спорт бөлімінің әдістемелік жұмыс жоспарына сәйкес, педагогикалық үрдісте инновациялық әдіс-тәсілдерді енгізу арқылы педагогтердің шығармашылық қабілеттерін жан-жақты дамуына мүмкіндік жасау және педагогикалық біліктілік дағдыларын көтеру, іс-тәжірибе алмасу мақсатында Маяковский атындағы негізгі мектепте 2017 жылдың 10 наурызында «Оқу үрдісіне 7 модуль әдіс-тәсілдерін енгізу» тақырыбына аудандық семинар-практикум ұйымдастырылды. Семинарда қазақ, орыс, ағылшын тілдері және биология пәндерінің мұғалімдері өз іс-тәжірибелерімен бөлісті.
Ағылшын тілі пәнінің мұғалімі Ж.Н.Жумагулова «Avisit to the cloctor» тақырыбына 9 сыныпта, 3 сыныпта қазақ тілінің маманы Г.Ж. Жумаканова «Етістікті қайталау» тақырыбына өткен ашық сабақтарда 7 модульді тиімді қолдану жолдарын көрсетті. Бастауыш сынып мұғалімі Г.Ж. Нуртазинаның 1 сыныпта өткізген сабағынан оқушылардың 7 модуль бойынша дағдыларының бар екені анық байқалды. Семинарға қатысушылар шағын жинақталған мектеп жағдайында біріктірілген сыныпта сабақ беруде 7 модульді қолдану бойынша қазақ тілі және әдебиеті пәнінің мұғалімі С.Б. Алимбаеваның шеберлігін сынады. Орыс тілі және әдебиеті пәнінің мұғалімі А.К. Кумарова аудиоматериал қолдана отыра «Домашние животные и птицы» тақырыбын оқушыларға толық меңгерте білді. Биология пәнінің мұғалімі Р.М.Бекмухаметов жас маман болса да өзі таңдаған мамандығын жақсы игергенін, тәлімгері Г.Т. Саржановадан оқып-үйренген 7 модульді кезең-кезеңімен қолдана біліп, «Астық тұқымдастар. Гүлі мен жемісінің құрылысы» тақырыбына өте қызықты ашық сабақ көрсетті.
Пән мұғалімдерінің еңбектері аталып өтіліп, қатысушылар іс жүзінде 7 модульді қолданудың әдіс-тәсілдерін көрсеткен Маяковский атындағы негізгі мектеп мұғалімдеріне шығармашылық табыс тілеп, семинар жұмысына оң баға берді.
Білім, дене шынықтыру және спорт бөлімі
