Халыққа қызмет көрсету орталығы жаңа ғимаратқа көшті

Жібек маталар комбинаты шағын ауданында орналасқан ХҚКО Өскемен қалалық №1 бөлімінің мекенжайы ауысты. Бұрын бөлім көпқабатты тұрғын үйдің бірінші қабатында, дүкенмен бірге, бір алаңда орналасқан еді.

Жаңа ғимарат ел Тәуелсіздігінің 25 жылдық мерейтойына орай ашылып, тұрғындар үшін барлық жайлы жағдайлар ұсынылған. Айта кетейік, реттеу залында 44 жұмыс орны және электрондық үкімет порталы арқылы қызмет алуға болатын «Connection point» өзіне-өзі қызмет көрсету секторы бар. Одан өзге мүмкіндіктері шектеулі жандардың да жағдайы жақсы ескерілген.

- Мемлекеттік корпорация адамдарға көмек көрсету үшін құрылған, - дейді «Азаматтарға арналған үкімет» мемлекеттік корпорациясы басқарма төрағасы Данияр Еренчинов. - Сонымен қатар, біз шығындарды оңтайландыру жолдарын ойлауымыз керек. Жалға алынған ғимараттар үшін үлкен қаражат төлеп қайтеміз, оның үстіне ол адамдар үшін қолайсыз болса. Сондықтан біз өз ғимаратымызда жөндеу жұмыстарын жасадық, көріп тұрғандарыңыздай ол бұрынғыдан да жарық, жылы, үйлесімді. Біздің ең басты мақсатымыз – адамдардың өмірін жақсарту.

Жаңа ғимарат Сәтпаев даңғылы, 34/2 мекенжайында орналасқан. Фронт-офистің жұмыс кестесі өзгерген жоқ: дүйсенбі мен сенбі күндері аралығында сағат 9.00-ден 20.00-ге дейін, үзіліссіз жұмыс істейді.

Айта кетейік, бөлек тұрған жаңа ғимараттың бірінші қабатында Халыққа қызмет көрсету орталығы департаментінің фронт-офисі орналасса, екінші қабатында Жер кадастры және жылжымайтын мүлікті техникалық тексеру департаменті мамандары орналасқан.

Назерке Нұрболатқызы