Өскемен мен ШҚО Аягөз гарнизонында жауынгерлер тактикалық оқу-жаттығу барысында машығын жетілдірді
Аягөз гарнизонындағы танк құрамасында шынайы ұрысқа барынша жақындатылған жағдайда бөлімшелердің далалық дағдысын және үйлесімділігін жетілдіру үшін «Майлин» полигонында арнайы роталық тактикалық оқу-жаттығуы өтті
Басты мақсаты – роталардың жауынгерлік әзірлігін жетілдіру, олардың үйлесімділігін тексеру және әскери қызметшілердің өздерінің функционалдық міндеттерін іс жүзінде орындағанына баға беру, сондай-ақ практикалық машықты шыңдау. Жеке құрам арнайы тапсырмаларды орындар алдында қауіпсіздік шараларымен танысты. Бұл оқу-жаттығу жеке құрамның теорияда алған білімін іс жүзінде орындап, тәжірибе жинауға мүмкіндік берді.
Полигонда өткен оқу-жаттығу барысында әскери қызметшілер заңсыз қарулы топтарды жою жөнінде шартты тапсырманы орындады. Осындай тапсырмаларды орындау барысында ойламаған жерден шабуыл жасаған қарулы топтың алдын алу және жеке құрамның үйлесімді іс-қимылы пысықталды. Сарбаздар жауынгерлік машиналардан және штаттық қарудан атыс жүргізіп, тәжірибе жинақтады, – деді танк батальонының командирі майор Ринат Сағындықов.
Нәтижелері бойынша жеке құрамның дайындығы басшылық тарапынан «жақсы» деп бағаланды. Шараға барлығы 60-қа жуық әскери қызметші қатысып, 15-тен астам әскери техника бірлігі жұмылдырылғанын айта кеткен жөн.
