Өскемен мен ШҚО Шығысқазақстандықтар Ұлыстың ұлы күні әлемдік рекорд орнатты
Өскеменде 5 мыңнан астам домбырашы бір уақытта "Ақбұлақ" әнін орындады
ШҚО әкімі мен Өскемен қаласының әкімі бастаған ұлттық киімдегі 5201 адам республика алаңында домбырамен ән айтып, бұл ресми түрде Гиннестің рекордтар кітабына енді, деп хабарлайды Устинка LIVE тілшісі.
Әлемдік рекордты растайтын сертификат облыс әкіміне салтанатты түрде табысталды.
Жалпы әз Наурызға орай орталық алаңда 10 ақшаңқан киіз үй тігілді. Қала тұрғындары мен қонақтарына арналған мерекелік бағдарлама мазмұнды әрі алуан түрлі. Концерт қойылып, ұлттық ойындар ойнатылып, жәрмеңкелер ұйымдастырылуда.
Баршаңызды Ұлыстың ұлы күнімен шын жүректен құттықтаймын! Әз-Наурыз - береке мен бірліктің, ырыс пен ынтымақтың бастауы, жақсылықтың жаршысы. Мемлекет басшысы Қасым-Жомарт Кемелұлы Тоқаевтың бастамасымен төл мерекеміз жаңа мазмұнда, жаңа сипатта тойланып келеді. Әр шаңыраққа құт-береке, шаттық пен қуаныш тілеймін. Ұлыс оң болсын! Ақ мол болсын! - деді облыс басшысы Нұрымбет Сақтағанов.
Айта кетейік, күндізгі концерттік бағдарламада "Алашұлы", Bayansulu және Гүлнұр Салбанова сынды танымал әншілер мен шығармашылық ұжымдар өнер көрсетеді.