Өскемен мен ШҚО Шемонаиха ауданында республикалық тас жолдағы ұялы байланыс реттелмек
Қазір биіктігі 60 метрлік антенна-мачталық діңгекті орнату үшін жобалық құжаттама әзірленуде
Бұл туралы облыс әкімі Нұрымбет Сақтағанов айтты, деп хабарлайды Устинка LIVE тілшісі.
Қазіргі уақытта Шемонаиха жұртшылығының 95,1%-ына интернет қолжетімді.
Екі мыңнан астам адам тұратын 9 елді мекенде байланыстың болмауына немесе сапасыздығына қатысты арыз-шағымдар түсіп жатыр. Большая Речка және Медведка ауылдарында бюджет қаражаты есебінен антенна-мачталық діңгектер құрылысы аяқталды. Қалған ауылдарды интернетпен қамтамасыз ету 2027 жылға дейін кезең-кезеңімен, "Қолжетімді интернет" ұлттық жобасы аясында байланыс операторларымен бірлесіп жүзеге асырылады, - деді Нұрымбет Сақтағанов.
Айта кеткен жөн, аудандағы 6 мектепті жоғары жылдамдықты интернетпен қамтамасыз ету мақсатында Starlink орнатылған.
Сондай-ақ көлік жолдарындағы ұялы байланыс мәселесін шешу үшін биіктігі 60 метрлік антенна-мачталық діңгекті республикалық тасжол бойында орнатуға жобалық құжаттама әзірленуде.