Өскемен мен ШҚО Семейдегі емханаға әкім келерде пациенттердің көлігін автотұраққа кіргізбей қойған
Абай облысының әкімі Нұрлан Ұранхаев Семей қаласындағы №1 емханаға барған болатын
Тұрғындар бұл күні аурухана тұрағына көліктерін қоя алмағандарын айып шағымданған, деп хабарлайды Устинка LIVE.
Алайда облыс әкімдігі ешкімге бұндай пәрмен берілмегенін алға тартады.
11 қыркүйекте әлеуметтік желіде Абай облысының әкімі Нұрлан Ұранхаев Семей қаласындағы №1 емханаға жұмыс барысымен келуінің алдында емхана қызметкерлері тұрғындардың көліктерін автотұраққа кіргізбей қойғаны туралы ақпарат тарады.
Абай облысының әкімдігі емханаға келушілерді автотұрақ аумағына кіргізуге тыйым салу туралы ешқандай нұсқау берілмегенін хабарлайды. Мемлекеттiк органдардың салалық мекемелерге баруының басты мақсаты – олардың халыққа көрсететін қызметін және ғимараттардың жай-күйiн тексеру, - деп мәлімдеді облыс әкімдігі. - Қазіргі таңда оқиғаның мән-жайын анықтау үшін тексеру жұмыстары жүргізіліп жатыр.
Айта кеткен жөн, аймақ басшысы Нұрлан Ұранхаев 11 қыркүйекте №1 емханаға барып, оңалту терапиясы, жедел медициналық көмек, балалар стоматологиясы және т.б. бөлімдердің жұмысымен, медициналық мекеменің амбулаториялық дәріхана қызметімен танысқан болатын.