Риддер ЖЭО-ның бұрынғы басшылары алаяқтық фактісі бойынша тергеуге алынды

Бұл туралы ҚМА Шығыс Қазақстан облысы бойынша департаменті мәлімдеді, деп хабарлайды Устинка LIVE тілшісі.

Олар алдау және сенімін теріс пайдалану арқылы бөтеннің мүлкін жымқырып, аса ірі көлемде мемлекетке 4,1 млрд теңге залал келтірген деген күдікке ілінді, - делінген ақпаратта. - Тергеу барысында тозып, бірнеше рет істен шыққан ЖЭО жабдықтарын жөндеуге арналған қаражаттың жүйелі түрде ұрлануы себеп болғаны анықталды.

ҚМА ақпараты бойынша, 2018-2022 жылдар аралығында Риддер ЖЭО-ның бұрынғы лауазымды тұлғалары ғылыми-техникалық қызмет көрсету, қазандықтарға, жылу желілеріне және турбогенераторларға күрделі жөндеу жұмыстарын жүргізу үшін кәсіпорындармен жалған келісімшарттар жасап, уәкілетті органға жалған есептер ұсынған.

Тергеу барысында қабылданған шаралар мен ҚР Премьер-Министрінің төрағалығымен Үкімет жанындағы Экономиканы демонополизациялау жөніндегі комиссия шеңберінде Риддер қаласындағы жылу энергиясын өндіру станциясын мемлекет меншігіне беру арқылы келтірілген шығынды өтеуді қамтамасыз етті, оның құны шамамен 5,5 млрд теңгені құрайды.

ҚР ҚПК 201-бабының талаптарына сәйкес сотқа дейінгі тергеп-тексерудің өзге де деректері жария етілуге жатпайды.