Өскемен мен ШҚО Катонқарағайдағы айтысқа Қырғызстан мен Моңғолиядан ақындар келді
Катонқарағай ауданында "Алтай – түркі әлемінің алтын бесігі" фестивалі аясында халықаралық айтыс өтті
Қатысушылардың қатарында республикалық және халықаралық айтыстардың жеңімпаздары, "Алтын домбыра", "Асыл домбыра" иегерлері мен мемлекеттік сыйлықтардың лауреаттары болды, деп хабарлайды Устинка LIVE тілшісі.
Сөз сайысына Дидар Қами, Жансая Мусина, Рүстем Қайыртай, Мейірбек Сұлтанхан сынды халықтың аяулы ақындар қатысты.
Айтыс аралығында көрермендер "Назқоңыр", "Дарабоз" вокалдық топтарының және мәдениет пен өнер саласының көрнекті өкілдерінің қатысуымен өткен концерттік бағдарламаны тамашалады.
Қорытынды сөз сөйлеп, бас жүлдені ШҚО әкімі Нұрымбет Сақтағанов табыстады. Бас жүлде – 3 млн теңге қарағандылық Дидар Қамиға бұйырса, 1-орынның 2 млн теңгесін Рүстем Қайыртай алды. Ал 2-орынды қос жүйрік Жайықтың қызы Жансая Мусина мен қырғыз елінің намысын қорғаған Нұрсұлтан Малдыбаев 1 млн теңгеден бөлісті. 3-орынның 750 мың теңгесі Сыр елінен келген Нұрмат Мансұров пен Шығыс өңірінен Серік Қуанғанға бұйырды.
Шара түркі дүниесінің мәдениеттерін тоғыстырған, қазақтың айтыс өнерінің рухани құндылығы мен мәртебесін көтерген айтулы оқиға болды.