Өскемен мен ШҚО ШҚО-дағы Қайсенов кентінде жақсы шырша орнатуға қаржы жоқ па?
Кеше әлеуметтік желіде Ұлан ауданы орталығында орнатылған тірі шырша көпшіліктің қызу талқысына қалды
Біреулердің күлкісін, ал енді бірінің ашуын келтірген шыршаны кеше бірден алып тастады, деп хабарлайды Устинка LIVE тілшісі.
Бұтақтары салбырап, ескірген шамдар тағылған тірі шырша интернеттегі жергілікті жұртшылық арасында қызу талқыға түсті. Қолданушылар мұндай "сұлулыққа" қанша ақша жұмсалғанына жауап беруді талап еткен. Тіпті желі қолданушылар оны "жыл масқарасы" деп атады.
Анықталғандай, бұл шырша ауыл тұрғындарының бірінің ауласынан қазылып әкелінген. Күн сәулесін көлегейлеп тұрған шыршаны ауыл тұрғыны кесіп тастауды сұраған. Бірақ әкімдік қызметкерлері тірі шыршаны қимай, қазып әкеліп кент орталығына орнатып, аздап безендіріп қойған. Бірақ тым жұтаң шырша кент тұрғындарының ғана емес, бүкіл елдің талқысына түсті. Артынша әкімдіктегілер шыршаны алып тастады.
Шырша бюджет есебінен емес, тегін орнатылды. Жаңа, жасандысын қоямыз. Бірден айта кетейін, бұған бюджеттен ақша қарастырылмаған. "Ұлан" қоры бар. Бәлкім, осы қор қаражаты есебінен орнататын шығармыз. Әзірге белгісіз. Бүгін шыршаны алып тастады, ертең жаңасын қоямыз, - деді Ұлан ауданы әкімдігінің баспасөз қызметі өкілдері.
