Өскемен мен ШҚО Жанұзақ ауылында жаңа спортзал ашылды
Енді ауылдағы мектеп оқушылары дене шынықтыру сабағын осының ішінде өткізеді
Ұлан ауданындағы ашылу салтанатына облыс әкімі Нұрымбет Сақтағанов қатысты, деп хабарлайды Устинка LIVE тілшісі.
Спортзал құрылысына облыстық блім басқармасынан қаражат бөлінген. Жобаның жалпы құны - 102 млн теңгеге жуық. Бас мердігер - "Древстроймаркетинг" ЖШС.
Жалпы аумағы 404,52 шаршы метрді құрайтын ғимаратта жаттықтырушы кабинеті, қыздар мен ұлдарға арналған киім ауыстыратын бөлмелер, душ, санитарлық тораптар мен өзге де қажетті бөлмелер қарастырылған. Спортзал тиісті құрал-жабдықтармен және барлық қажетті инженерлік желілермен жабдықталған.
Аталған жоба өңірдегі спорттық инфрақұрылымды дамытуға, балалар мен жасөспірімдер үшін денесін шынықтырып, спортпен шұғылдануға қолайлы жағдай жасауға бағытталған.
Осы спортзалдан әлемдік додаларда көк туымызды желбірететін чемпиондарымыз шықсын. Ең бастысы, балаларымыз денелерін шынықтырып, жан-жақты дами берсін. Бүгінде Ұлан ауданындағы 32 мектептің ішінде спортзалы жоқ 3 білім ордасы қалды. Алдағы уақытта оларға да осындай спортзалдар саламыз, - деді аймақ басшысы.