Өскемен мен ШҚО ШҚО-да сирек кездесетін Түркістан сілеусіні бейнежазбаға түсіп қалды
"Тарбағатай" мемлекеттік ұлттық табиғи паркі аумағында экологиялық мониторинг жұмыстары жүріп жатыр
Мониторинг барысында сирек кездесетін әрі қорғауға алынған жыртқыш сүтқоректі – Түркістан сілеусіні (Lynx lynx isabellinus) камера объективіне ілікті, деп хабарлайды Устинка LIVE тілшісі.
Алынған бейнематериалдар аталған түрдің табиғи мекендеу ортасында тұрақты кездесетінін көрсетеді. Түркістан сілеусінінің тіркелуі табиғи экожүйелердің сақталу деңгейін және табиғатты қорғау бағытында жүргізіліп жатқан іс-шаралардың тиімділігін айғақтайды,- деп жазды "Тарбағатай" мемлекеттік ұлттық табиғи паркінің испекторы Е. Мырзағали.
Ұлттық парк аумағында сирек және жойылып кету қаупі бар жануарлар түрлерін бақылау жұмыстары заманауи әдістерді, соның ішінде фототұзақтар мен бейнетіркеу құралдарын пайдалану арқылы тұрақты түрде жүзеге асырылуда. Жиналған деректер ғылыми-зерттеу жұмыстарына және биологиялық алуан түрлілікті сақтау шараларын жоспарлауға қолданылады.