Өскемен мен ШҚО Ақжар ауылынан Шіліктіге дейінгі жол жөнделіп жатыр
Жөндеу жұмыстары ағымдағы жылдың соңына дейін аяқталмақ
Ақжар – Шілікті жолының 78-93 шақырым аралығындағы 15 км учаскеге асфальт төселеді, деп хабарлайды Устинка LIVE тілшісі Тарбағатай ауданы әкімдігінің ақпаратына сүйеніп.
Тарбағатай ауданында көлік инфрақұрылымын жақсарту бағытындағы маңызды жобалар өз жалғасын табуда. Қазіргі уақытта "ОблШығысЖол" ЖШС мердігер мекемесі Ақжар – Шілікті жолының 78-93 шақырым аралығындағы 15 км учаскеге жөндеу жұмыстарын жүргізіп жатыр. Жоба 2025 жылдың соңына дейін толық аяқталады деп жоспарланған, - деп мәлімдеді әкімдіктегілер.
Күні кеше атқарылып жатқан жұмыс барысын аудан әкімі Дархан Шомпайұлы мен аудандық мәслихат төрағасы Өмірхан Айкенұлы арнайы барып тексеріп қайтты. Жол сапасына, құрылыс қарқынына және техникалық талаптарға сай орындалуына баса назар аударылды.
Шекаралық аймақта орналасқан Жаңаауыл ауылдық округі тұрғындары үшін бұл үлкен қуаныш. Жолдың жақсаруы – ауылдың әлеуметтік-экономикалық дамуына, халықтың жүріп-тұруына, жедел жәрдем, мектеп, пошта, байланыс секілді қызметтердің қолжетімді болуына тікелей әсер етеді.