Өскемен мен ШҚО Тарбағатай ауданында алғаш рет заманауи травматологиялық ота жасалды
Наурыздың мерекелік демалысында аудандық ауруханаға Ақжар ауылының тұрғыны жедел түрде түскен
Науқастың оң жақ сан сүйегінің ортаңғы бөлігі сынып, сынық бөліктері орнынан жылжып кеткен, деп хабарлайды Устинка LIVE тілшісі аудандық әкімдңк ақпаратына сүйеніп.
Дәрігерлер науқасты қарап, облыс орталығына барудың қажеті жоқ екенін, аудандық ауруханада да енді түтікті сүйектердің сынығында қолданылатын әлемдік алтын стандарт «жабық құлыптама остеосинтез» операциясын жасауға болатыны түсіндірілген.
Ота 2,5 сағатта сәтті аяқталды. Егер болашақта аламыз деп жоспарлап отырған ЭОП С дуга аппараты келген болса, операция ұзақтығы бұдан да қысқарған болар еді. Операциядан кейінгі рентген суреттерінен сүйек сынықтары біріктіріліп бекітілгенін көруге болады. Ең бастысы - бұл операция үлкен тіліктер жасамай, сынық орнын толық кесіп ашпай, жабық түрде, аз жарақаттап, ұзындығы 1-3 см үш кішкентай тіліктер арқылы жасалды, - дейді мамандар.
Айта кеткен жөн, операция МӘМС жүйесі арқылы тегін жасалды. Негізі бүгінгі таңда мұндай операция құны 699 946 теңге екен.
Науқас ары қарай амбулаторлық емге ауыстырылып, реабилитациялық емдерін алатын болады. Болашақта Тарбағатай аудандық ауруханасында ауданаралық политравма төсектерін ашып, науқастарға қолжетімді сапалы медицинаны ұсыну жоспарлануда, - делінген Тарбағатай аудандық әкімдігі ақпаратында.