Күршім мен Марқакөл аудандарында әлі жол жоқ

Мұндағы кейбір елді мекендерге жол жоқ, деп хабарлайды Устинка LIVE тілшісі.

Осыған байланысты облыс әкімінің тапсырмасы бойынша арнайы мобильді топ құрылып, ұшақпен облыс аумағын бақылап өтті.

Мобильді топ құрамында облыс әкімінің бірінші орынбасары Нұрымбет Сақтағанов, өңірдің жолаушылар көлігі және автомобиль жолдары басқармасының басшысы, төтенше жағдайлар және басқа да жауапты құрылымдардың өкілдері бар.

ШҚО әкімдігі ақпаратына сүйенсек, Күршім және Марқакөл аудандарында табиғи сипаттағы ТЖ режимі сақталады. Қазірде Күршім-Қалжыр учаскесіндегі облыстық тас жол көлік қозғалысы ашық. Сондай-ақ, Марқакөл - Ұрынқай-Төсқайын бағыты бойынша ашылған жол кеңейтіліп, ертеңнен бастап Шағанатты және Балықты Бұлақ ауылдарына апаратын жолдарды тазарту басталады. Тұрғындарға тікұшақтың көмегімен азық-түлік пен дәрі-дәрмек уақтылы әкелініп, көмекке мұқтаж адамдар облыс орталығына жеткізілді.

Топ жұмысының нәтижесінде біз нақты жағдайды көріп, жолдарды тазарту, қанша қар тазалау техникасының жұмылдыру қажеттілігін анықтап, бақылауда ұстай аламыз, - деп жазды облыс әкімі Ермек Көшербаев өзінің әлеуметтік желідегі жеке парақшасында.