Өскемен мен ШҚО ШҚО-да "Шығыс салбұрыны - 2023" халықаралық бүркітшілер фестивалі өтеді
Жарысқа әлемнің бес елінен және еліміздің әр өңірінен бүркітшілер қатысады
Сондай-ақ, Қазақстаннан және шет елдерден 600-ге жуық турист келеді деп жоспарлануда, деп хабарлайды Устинка LIVE.
Бүркітшілер сайысын Ұлан ауданы осымен үшінші жыл қатарынан ұйымдастырып отыр. Биылғы фестиваль Бозанбай ауылында 24-25 қараша күндеріне жоспарланған. Мақсаты - ұлттық спорт түрлерін дамыту, халық арасында ұлттық құндылықтарды құрметтеу, патриотизмге тәрбиелеу арқылы салауатты өмір салтын насихаттау.
Жарысқа Қазақстанның түкпір-түкпірінен және әлемнің бес елінен 40 бүркіт, 10 сұңқар және 30 тазы қатысады. Сонымен қатар, шараға ҚР Ұлттық спорт қауымдастығы Республикалық "Қыран" федерациясы" қоғамдық қорының вице-президенті Бағдатхан Мүптекеқызы және әлемге танымал бүркітші қыз Айшолпан Нұрғайыпқызы да қатысады, - дейді Ұлан ауданы әкімінің орынбасары Қуат Оқасов.
Екі күндік жарыс барысында қыран құсты қолға шақыру, шырғаға салу, қоянға салу, түлкіге салу, сұңқарды кептерге салу түрлері бойынша өтеді. Тазы иттерді 1 км қашықтыққа жүгіртеді.
Қазақстаннан және шет елдерден 600-ге жуық турист келеді деп жоспарлануда. Осы жарыстардан өзге, облыстың танымал жиһанкезі, Ұлан ауданының тумасы Мұхтар Тойбазаровтың қолдауымен қонақтар үшін атпен серуендеу, садақ ату, бағалы сыйлықтардың ұтыс ойыны ұйымдастырылады, - деп толықтырды спикер.
Жарыс өтетін жерде, қазақ этностилінде 15 киіз үй тігіледі. Олардың әрқайсысының ішінде қазақ халқының халық қолөнерінің көрмесі ұйымдастырылып, ниет білдірген қонақтар үшін шеберлік сағаттары өтеді.
