Өскемен мен ШҚО Өскеменде иесіз қалған үйден қару-жарақ пен оқ-дәрілер табылды
Тәртіп сақшылары қараусыз тұрған ескі үй ішінен жауынгерлік қарулар мен атуға жарамды оқтар тапқан
Осыған байланысты тергеу жұмыстары жүргізіліп жатыр, деп хабарлайды Устинка LIVE тілшісі ШҚО ПД ақпаратына сүйеніп.
22 мамыр күні ШҚО ПД ұйымдасқан қылмысқа қарсы күрес басқармасының қызметкерлері ҰҚКД және ШҚО бойынша ҚАЖД-мен бірлесіп жедел-іздестіру іс-шараларын жүргізу барысында Өскемен қаласының иесіз үйлерінің бірінен заңсыз сақталған қаруды тапқан, – делінген хабарламада. - Тәртіп сақшылары нөмірлері өшірілген 7,62 мм калибрлі Наган ойық тапаншасын, оған 7,62 мм калибрлі 188 патронды, ТОЗ 34 ЕР аңшылық мылтығынан оқпанды, Ф1 граната корпусын, аңшылық мылтықтан 20 калибрлі 12 патронды, сондай-ақ 4 сигналдық зымыранды тапқан.
ҚР ҚК-ның 287-бабы 3-бөлігі (Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру) бойынша сотқа дейінгі тергеу жүргізіліп жатыр. Баллистикалық сараптама нәтижелері бойынша тапанша жауынгерлік деп, ал патрондар оқ атуға жарамды деп танылды.
ШҚО полиция департаменті өңірде “Қару тапсыр” науқаны өтіп жатқандығын естеріңізге салады. Оның аясында заңсыз сақталған қару-жарақ заттарын өз еркімен тапсырған азаматтар қылмыстық және әкімшілік жауапкершіліктен босатылады. Оның үстіне қару мен оқ-дәрілерді ерікті түрде тапсырғаны үшін қарудың техникалық жай-күйіне байланысты оның әрбір бірлігі үшін республикалық бюджеттен 10-нан 100 АЕК-ге дейінгі сомада төлем көзделеді. Қаруды тапсыру үшін кез келген полиция бөліміне өтініш білдіріп немесе “102” нөміріне қоңырау шалу қажет.