Өскемен мен ШҚО Өскемендегі дарынды балалар әскери өмірдің тыныс-тіршілігімен танысты
Даңқты қолбасшы Бауыржан Момышұлының туғанына 112 жыл толуына орай Өскемен гарнизонындағы 27943 әскери бөлімінде ашық есік күні ұйымдастырылды
Ашық есік күні аясында Өскемендегі Білім-инновация лицейінің оқушылары әскери бөлімнің тыныс-тіршілігімен танысуға мүмкіндік алды, деп хабарлайды Устинка LIVE тілшісі Өскемен гарнизонының баспасөз қызметінің ақпаратына сүйеніп.
Келушілер назарына әскери қару-жарақтың түр-түрі және әскери ұрыс техникалары да ұсынылды. Балалар әскери өмірді көріп, арнайы әскери киім үлгілері, әскери техника және қару-жарақ түрлерімен, сонымен қатар радиациялық, химиялық және биологиялық қауіп төнген кезде киетін арнайы киім үлгілерімен танысты, - делінген хабарламада.
Сонымен қатар, жауынгерлер оқушылар назарына қоян-қолтық ұрыс тәсілдерінен көрініс көрсетті. Іс-шара барысында оқушылар сарбаз асханасында түскі астан дәм татты.
Әскери бөлімде ашық есік күнін өткізу арқылы біз болашақ Отан қорғаушы ұрпаққа әскери-патриоттық, Отан алдындағы азаматтық борышты өтеудің маңыздылығын түсіндіреміз. Бұл жастардың өз елі сүюге үйрететін, оларды адалдыққа тәрбиелеудегі басым бағыттардың бірі болып табылады, - деп атап өтті бөлім командирінің тәрбие және идеологиялық жұмыстары жөніндегі орынбасары подполковник Абзал Таждинов.