Өскемен мен ШҚО Өскеменде есірткіні таксимен жеткізбек болған курьер ұсталды
19 жастағы бойжеткен енді бас бостандығынан айырылуы мүмкін
Полиция қызметкерлері такси жүргізушісін тоқтатқанда көліктегі жолаушыдан есірткі табылған, деп хабарлайды Устинка LIVE.
Есірткі қылмысына қарсы іс-қимыл басқармасының қызметкерлері ШҚО ПД КҚО, Үлбі ПБ криминалдық полициясымен және ҚР ҰҰ бірлесіп жүргізген операция барысында тоқтатылған көлікте 31 жастағы жүргізушімен бірге 19 жастағы бойжеткен отырған, - делінген ШҚО ПД таратқан ақпаратта. - Жас қыздың интернет-дүкеннің курьері болып жұмыс істейтіні анықталды. Полицейлер ұсталған адамнан спецификалық иісті ақ түсті заты бар 45 ораманы тауып, тәркілеген. Сараптаманың қорытындысына сәйкес, тәркіленген зат жалпы салмағы 35,6 грамм болатын "Альфа-pvp" психотроптық заты болып табылады.
Бойжеткен кінәсін мойындады. Оған қатысты ҚР ҚК-ның 296-бабы 4-бөлігі бойынша сотқа дейінгі тергеу жүргізілуде. Аталған бап үш жылдан жеті жылға дейінгі мерзімге бас бостандығынан айыру түріндегі жазаны көздейді.