Өскемен мен ШҚО ШҚО-да биыл жазда жеті адам суға батып көз жұмды
1 қыркүйектен бастап шомылу маусымы ресми түрде аяқталды, құтқарушылар қорытынды жасады
Жазғы кезеңде ШҚО ТЖД қызметкерлері 14 адамды, оның ішінде 2 баланы суға батудан құтқарған, деп хабарлайды Устинка LIVE тілшісі.
ШҚО ТЖД Азаматтық қорғаныс басқармасының бастығы Руслан Орынбековтың мәліметінше, жаз мезгілінде су айдындарында 7 азамат суға батып кеткен. Статистика көрсетіп отырғандай, оқиғалар көп жағдайда адамның өз кінәсінен, шамадан тыс өзіне деген сенімділіктің, өз күштерін асыра бағалаудың, судағы жүріс-тұрыс ережелерін ескермеудің, тыйым салынған және таныс емес жерлерде шомылудың, алкогольдік масаң күйде болудың нәтижесінде орын алған.
Суға батқандардың барлығы 18-46 жас аралығындағы ер адамдар, - дейді Руслан Орынбеков. - Оқиғалар негізінен демалыс күндері тіркелген. Жеті жағдайдың екеуі Ұлан ауданындағы көлдерде орын алды. Шомылу маусымы басталғаннан бері адамдардың көпшілік демалатын орындарында 189 бұзушылық анықталды: 364-бап "ортақ су пайдалану қағидаларын бұзу" бойынша 80 адам, 440-бап "алкогольдік ішімдіктер ішу немесе қоғамдық орындарда масаң күйде болу" бойынша 75 азамат жауапқа тартылды. "Су айдындарындағы қауіпсіздік ережелерін бұзу немесе орындамау" 412-бабы бойынша 1 адам және "кемелерді, оның ішінде шағын көлемді кемелерді пайдалану қағидаларын бұзу, сондай-ақ құқығы жоқ адамдарды басқару" 582-бабы бойынша 33 адам жауапқа тартылды.