Өскемен мен ШҚО Оралханның кітабын онлайн да оқуға болады
"Алтайдың Кербұғысы" атанған жазушы Оралхан Бөкейдің шығармаларын қалың оқырман электронды кітапханадан да оқып жүр
Оралхан Бөкей атындағы жалғыз кітапхана жазушының бүкіл шығармаларын топтастырып, Bokey.kz - электронды кітапханасына жүктеді, деп хабарлайды Устинка LIVE тілшісі.
Электронды кітапхананың ерекшелігі – Оралхан кітаптарын қазақ, ағылшын, қырғыз, парсы, болгар, эстон, словак, орыс тілдерінде бүкіл әлем оқырмандары виртуалды оқи алады. Электронды кітапхана екі тілде, яғни қазақ және орыс тілдерінде құрылған, - деп мәлімдеді кітапхананың баспасөз қызметі.
Виртуалды кітапханаға жазушының шығармаларымен бірге, ата-тек тарихы, өмірбаяны, мұрағат қорында сақталған деректер, қолтаңбалары мен қолжазбалары, күнделік жазбалары, фотосуреттері жинақталған. Сонымен қатар, жазушының замандастары мен қаламдастарының Оралхан туралы естеліктері де осында.
