Мақсұтқан Көсеубаевтың жыр жинағы жарық көрді
Бұл күні жасы 70-ке келген Мақаңның "Жүректен шыққан сырларым" атты өлеңдер жинағының тұсаукесері өтіп, оған аягөздік жырсүйер қауым куә болды
![Усть-Каменогорск и ВКО / Мақсұтқан Көсеубаевтың жыр жинағы жарық көрді Усть-Каменогорск и ВКО / Мақсұтқан Көсеубаевтың жыр жинағы жарық көрді](/upload/resize_cache/iblock/825/yhpa5k9mjf49crm3qh9c5ekbm96lor0l/1440_960_1/Mereytoy-_-fotony-avtor-_syndy-_4_.jpg)
Аягөз аудандық кітапхана үйінің оқырмандар залында бір тамаша кеш өтті. "...Өлеңге әркімнің-ақ бар таласы" деп хакім Абай айтпақшы, маңдайдағы қос жанарынан айырылған зағип ақын Мақсұтқан Көсеубаев ағамыз жұртшылықты жауһар жырларымен сусындатып келе жатқан жан екенін жұртқа паш етті.
Аягөз аудандық мәдениет, тілдерді дамыту, дене шынықтыру және спорт бөлімі басшысы Жандос Амановтың мұрындық болуымен өткен шараға аудандық ардагерлер кеңесінің төрайымы Гүлшара Жағыпарқызы, қоғамдық кеңес мүшесі Айтқазы Қасымжанов, "Мөлдір Сана", "Аягөз жаңалықтары" газеттерінің редакторлары Бақытөмір Шалғынбай мен аудандық мәслихат хатшысы Ермек Дайырбаевтар қатысып, зағип ақын жайлы, оның жарық көріп отырған өлеңдер жинағы туралы ой толғады. Жандос Ілиясұлы Мақсұтқан ағамызға аудан әкімі Сейілбек Ысқақовтың "Алғыс хатын" табыстап, иығына шапан жауып, құрмет көрсетті. Кітапханашы А. Жұматаева Мақсұтхан Көсеубаевтың өмірбаянымен таныстырып, өлеңдерінен үзінділер оқыды. Өлең өлкесіне ат шалдырып жүрген атасының жауһар жырларын жинақтап, баспаға ұсынған ақынның келіні Жазира Билялова екен.
Жалпы, зағип ақын Мақсұтқан өлеңдерінің қарапайымдылығы мен шынайылығы өз оқырманын тәнті етеді. Мысалы, "Өзім туралы" деген өлеңінде:
Мақсұтқан да ауылда қой бағып жүр,
Өлең жазсам ба деп ойланып жүр.
Күндіз-түні көргені қой болған соң,
Өлеңінің ішінде қойлары жүр, - деп өзінің саналы ғұмырын қой бағумен өткізіп келе жатқанын өкінішпен өлең жолдарына айналдырса, ары қарай осынау киелі өнердің "кесірінен" ұйқы мен күлкіден айырылғанын тілге тиек етеді:
...Есенғали емепін, Есенин де,
Ақындардың мен жоқпын есебінде.
Бірақ кейде кеудемді жалын кернеп,
Ұйықтай алмай шығамын төсегімде, - деп налиды.
Қым-қуыт тіршілікте осының бәріне қолды бір сілтеп, қалаға, өнерсүйер қауымның, ақын-жазушылардың ортасына қосылғысы келсе де бір сәт ойлана келіп, өзін былай деп жұбатады:
...Бірақ та мен даламды қимаймын ғой,
Безерген бетон үйге сыймаймын ғой.
Далада ерте тұрсам, гүріл емес,
Шырылын бозторғайдың тыңдаймын ғой.
Табиғатпен біте қайнасып өскен ақынның жан сырын түсініп, өлең жолдарының шынайылығына сенесің. Ол өзін биік таулармен теңестірмей, ауыл маңындағы қарапайым ғана "Көгілдір" деген төбеге
теңейді:
...Қысқа ғана ғұмыр өтеді де кетеді,
Биік таулар ақынға әсер етеді.
Асқақатамай Алатау мен Алтайдай,
"Көгілдірдей" болсам маған жетеді, - деп сабасына түседі.
Зағип ақын Мақсұтқан Көсеубаевтың жасы 70-ке келгенде жарық көрген пышақтың қырындай ғана өлеңдер жинағының оқырман қауымнан өз бағасын алар күн
жақын...