Өскеменде Ұлттық ұлан әскери қызметшісі көршісін құтқарып қалды

ҰҰ "Шығыс" ӨңҚ баспасөз қызметінің бастығы  Бағдат Амангелді ұсынған ақпаратқа сүйенсек, оқиға болған күні Данияр тәуліктік кезекшіліктен кейін үйінде демалып жатқан.



Таңертең пәтерден шыға бере подъезде қараусыз жүрген көршінің мысықтарын байқап қалып, ескертпек болады.

- Байқасам көршінің есігі сәл ашық тұр екен. Есігін қағып едім, ешкім жауап қатпады. Тағы да қағып, артынша есікті ашқанымда еденде көрші әйел ауызынан көбігіп ағып жатыр. Ойлануға уақыт жоқ, дереу жедел жәрдемге қоңырау шалдым, - дейді кіші сержант Данияр Берлікбаев.

Жедел жәрдем жеткенше Данияр алғашқы медициналық көмек көрсетіп, есін жиюға көмектескен. Науқас бірінші қалалық ауруханаға жеткізілді.