ШҚО Кәсіпкерлер палатасына жаңа басшы тағайындалды

Облыстық кәсіпкерлер палатасының ақпараты бойынша, Қайрат Нұржанұлы Мамырбаев 1982 жылы туған, ШҚО Зырян ауданы Зырян қаласының тумасы, "Экономист" мамандығы бойынша Қазақстан-Америка еркін университетінде білім алған, деп хабарлайды Устинка LIVE тілшісі.

Еңбек жолын 2004 жылы салық қызметі органдарында бастады, 2007 жылдан 2011 жылға дейін банк жүйесінде, 2011 жылдан 2014 жылға дейін міндетті және ерікті сақтандыру жүйесінде жұмыс істеді.

ШҚО Кәсіпкерлер палатасына 2014 жылы келіп, жобаларды талдау және сүйемелдеу бөлімінің 2-санатты сарапшысы лауазымынан бастаған. 2018 жылы АӨК бөлімінің бастығы, содан кейін директордың экономикалық мәселелер жөніндегі орынбасары лауазымына ауыстырылды.

- Қайрат Нұржанұлының тікелей басшылығымен ШҚО Кәсіпкерлер палатасында жұмыс істеген уақытта кәсіпкерлікті қаржылық емес қолдау, агроөнеркәсіптік кешенді дамыту, жобаларды сүйемелдеу салаларындағы қызметтің қомақты көрсеткіштеріне қол жеткізілді, - дейді ӨКП. - Атап айтқанда, өңірдің отандық өндірушілерін қолдау және ОТӨ тауарлары мен қызметтеріндегі қазақстандық қамту үлесін арттыру, "Қарапайым заттар экономикасы" басым жобаларын жеңілдікпен кредиттеу бағдарламасы, "Еңбек" өнімді жұмыспен қамтуды және жаппай кәсіпкерлікті дамыту бағдарламасы, "Бизнестің жол картасы 2025" кәсіпкерлікті қолдаудың бірыңғай бағдарламасы, Шығыс Қазақстан облысында Ashyq жобасын іске асыру және т.б. бойынша үлкен тиімді жұмыс жүргізілді. Қайрат Нұржанұлы ШҚО тауар өндірушілері инфрақұрылымының сәйкестігін салыстыруды жүзеге асыратын арнайы комиссияның төрағасы болып табылады және ауыл шаруашылығы саласының нормативтік-құқықтық актілеріне өзгерістер енгізу бойынша ұсыныстарды әзірлеуге белсенді қатысады.

ӨКП директоры лауазымына Қайрат Мамырбаев "Атамекен" ҚР ҰКП конкурсының нәтижесі бойынша "Қазақстан Республикасының Ұлттық Кәсіпкерлер Палатасы туралы" Заңға және ішкі ережелерге сәйкес, кәсіпкерлікті дамытуға қосқан үлесі мен кандидаттың үлкен жұмыс тәжірибесін ескере отырып ұсынылды.

Бұрын ШҚО Кәсіпкерлер палатасын басқарған Шәкербек Мәріпбек Шәкербекұлы басқа жұмысқа ауысуына байланысты өз еркімен жұмыстан кетті. Естеріңізге сала кетейік, оның ӨКП басшысы ретіндегі қызметі Қазақстанда төтенше жағдай жарияланған сәттен бастап жүзеге асырылды және бизнеске қатысты шектеу шараларынан туындаған жоғары әлеуметтік шиеленіспен байланысты болды. Дегенмен, ШҚО Кәсіпкерлер Палатасы қызметтің көптеген бағыттары бойынша көшбасшылық ұстанымдарын сақтап қалды, өңірдегі шектеу іс-шараларын жеңілдету бойынша сындарлы ұсыныстар енгізді, сондай-ақ жақын арада кәсіпкерлерге төмен пайызбен және ыңғайлы кепіл саясатымен кредит бере бастайтын "Өскемен-Атамекен" микроқаржы ұйымын ашты.