ШҚО-да екі әйел колония ішіне жалған құжат арқылы өтпек болған

ШҚО ҚАЖД қызметкерлері колонияда отырған жазасын өтеушілерге ұзақ кездесуге жалған неке туралы куәлікпен өтпек болған екі азаматшаны ұстады. Екеуі де Қазақстанның басқа қалаларынан келген.

Құжаттарды тексеру кезінде ҚАЖД қызметкерлері олар ұсынған неке қию туралы куәлігінен күдіктенген. Ең алғаш күдік тудырған жайт – екі құжат та мереке күндері берілген. Екеуінде де бір адамның қолы қойылған. Ал бірақ құжаттар екі бөлек әділет басқармасында берілген.

- Тағы бір күдік тудырғаны – куәліктер ескі бланкімен толтырылған. Ал жазасын өтеп жатқан азаматтардың жеке құжаттарында үйленгендіктері туралы ақпараттар болмаған, - дейді ШҚО ҚАЖД Жанболат Қалетаев.

Азаматшарлар құжатты қайдан алғандықтарын түсіндіре алмады. Оқиға орнына дереу полиция қызметкерлерін шақыртқан.

- Егер құжаттар шынымен жалған болып шықса, азаматшалар заңға сәйкес қылмыстық жауапқа тартылады, - деді департамент басшысы.