ШҚО-да бірнеше ауылға ұялы байланыс желісі тартылды

Енді аталған ауыл тұрғындары ғаламторға алаңсыз кіре алатын болды. Бұған дейін бұл ауылда интернет қолжетімсіз болатын.

- "Цифрлық Қазақстан" мемлекеттік бағдарламасын жүзеге асыру мақсатында бүгін Аққайнар ауылдық округінің Қызылжұлдыз ауылында орнатылған телемұнара іске қосылып, халыққа "Актив" мобильді байланысы мен 3G интернет қолжетімді болды, - дейді аудан әкімдігі.

Ұялы байланыс мұнарасын орнату жұмысы Аққайнар ауылымен ғана шектелген жоқ. Аталған ауданға қарасты Поляковка ауылына да "Цифрлы Қазақстан" мемлекеттік бағдарламасын жүзеге асыру аясында мобильді байланыс орнатылды. 

- Қазіргі уақытта сигнал беру үшін 2 антенна орнатылған. Жақын арада 3 антенна орнатылады. Жаңа-Поляковка ауылында ұялы байланыс операторларының сигналы тұрақты жұмыс істеп тұр. Тұрғындар "Билайн", "Алтел", "Теле2", "Актив" операторларының байланысын және 3 G интернет жілісін қолдана алады, - дейді Катонқарағай ауданының әкімі Ренат Құрмамбаев. 

Айта кетейік, Глубокое ауданына қарасты Белокаменка ауылында да тұрғындардың сұранысымен "Altel", "Tele 2", "Beeline" мобильді байланыс мұнарасы орнатылды.

- Аудан әкімдігі мен ұялы байланыс операторларына Белокаменка ауылының тұрғындары хабарласып, ауылда ұялы байланыстың өте нашар екендігі туралы шағымданған. Тұрғындардан түскен шағымнан кейін LC Commerz компаниясы "Altel", "Tele 2", "Beeline" мобильді байланыс жүйесінің мұнарасын орнатты. Енді жергілікті тұрғындардың интернетті және ұялы байланысты үздіксіз пайдалануына мүмкіндігі бар, - дейді Глубокое ауданының әкімі Тамара Рахимжанова.

 Интернет тартылып ғаламторға қол жеткізген ауыл тұрғындарының көңілі шат. 

- Ауылымызға ғаламтор келіп қуанып қалдық. Бұған дейін ұялы байланыстың өзі нашар ұстайтын. Сыртқы әлемнен хабарсыз қалған едік. Енді барлығын интернеттен көріп, біліп жүретін болдық. Аудан әкімдігіне алғысымыз шексіз, - дейді Белокаменка ауылының тұрғыны Мирас Азамат Рысбек.

Сондай-ақ, Тарбағатай ауданы да өркениеттен шет қалмады. Бұндағы екі ауыл тұрғындары да енді ұялы телефонмен алыс-жақындағылармен байланыса 
алады.

- Құйған ауылдық округінде жақсы жаңалық. "Цифрлы Қазақстан" бағдарламасы аясында Құйған ауылында "Билайн" ұялы байланыс жүйесі іске қосылды. Сонымен қатар, Жамбыл ауылында да Теле2/Алтел ұялы байланысы жұмыс істеп тұр. Шекаралық елді мекендерді дамыту бағдарламасы осылай біртіндеп жүзеге аса бермек, - дейді ауылдық округ әкімі Ж. Жоламанов.